Andfótbolti

Bara til að ljúka þessu af.

Liverpool geta ekki neitt í fótbolta og munu ekki vinna ensku deildina í ár. Man utd eru með lang besta liðið og munu taka þetta í ár. Þó svo að Arsenal séu að spila góðan bolta þá ná þeir ekki að halda þetta út. Chelsea koma svo sterkir inn og munu enda í öðru sæti. Liverpool nær svo með naumindum að ná í fjórða sætið og Benitez verður rekin í vor ásamt því að nýjir eigendur sem hafa kannski vott af áhuga koma inn.

Ég ætla allavega ekki að gera mér vonir um að Liverpool vinni enska meistaratitilinn fyrr en liðið hefur max. 3 stig á efsta liðið um áramót. Hvenær það verður veit ég ekki.

Bið alla stuðningsmenn Man utd og Arsenal fyrirgefningar á því hafa haldið því fram að Liverpool gæti eitthvað í fótbolta.

Ég þakka guði fyrir að ég horfi ekki á leik helgarinnar því þá hefði þessi pistill verið ennþá svartsýnni. Ég þakka einnig guði að ég sé ekki að eyða einhverjum 70 þúsundum á ári í þetta rugl.

Ég spái því svo að Liverpool nái að vinna Luton 1-0 og vinni FA cup, þrátt fyrir að geta ekki neitt í fótbolta, því svona er boltinn.

Meistaraverkefni og ný tölva

Fékk fyrr í vikunni loksins að vita hvaða meistaraverkefni ég fékk úthlutað. "Dimensjonering av avstivende golvskive" heitir víst verkefnið og ég er bara nokkuð ánægður með það. Ég sett þetta verkefni í annað sæti en "Dimensjonering av avstivende veggskive" í fyrsta sætið. Ef ég fengi sjálfur að ráða hvernig náminu væri háttað væri ég frekar til í að taka fleiri fög í staðinn fyrir meistaraverkefni en maður fær víst ekki ráða öllu.
Veit í sjálfu sér ekki mjög mikið um þetta verkefni en þetta felst í því að búa til reikniörk/forrit til að reikna burðarþol forsteyptsgólfs og ýmsar pælingar með krafta og annað sem virka á gólfið. Á manna máli myndi þetta þýða hvað gólfið þolir marga feita kalla. Vona að þetta hjálpi fólki aðeins að skilja hvað maður er að fara gera næsta hálfa árið. Kemst kannski með betri útskýringu á þessu þegar maður er komin aðeins lengra með verkefnið.

En svo var einnig gerð stór fjárfesting í gær. Fjölskyldan fór saman og það var keypt eitt stykki fartölva. Þetta er í fyrsta skipti sem ég kaupi tölvu og er þetta því stórt skref fyrir svona ungan mann eins og mig ;). Eins og ég sagði í seinustu færslu var gamla fartölvan hennar Önnu að gera mig brjálaðan.
Acer Aspire 5720ZG var fyrir valin og erum við bara helvíti ánægð með hana. Hérna eru upplýsingar um mulningsvélina miklu. Vorum að skoða myndir á nýju tölvunni og settum sömu myndir á skjáinn á gömlu tölvunni (þeas borðtölvunni) og munurinn var eiginlega sorglegur, nú ættir maður vonandi að sjá myndirnar úr myndavélinni í sínu rétta ljósi.

Aldrei aftur...

Er ekki kominn tími á að láta aðeins í sér heyra. Nú er ég búinn að fá út úr öllum prófunum og get ég því með mikilli ánægju tilkynnt það að ég hef tekið mitt síðasta próf í NTNU eða einfaldlega mitt seinasta próf, vona það allavega.

Hérna er bæði mynd af tölvunni góðu (sjá neðar) og einnig lesaðstöðu mína niðri í skóla.

Eins og ég hef áður sagt hef ég aldrei lært eins mikið og þessa önn og voru því mikil vonbrigði að mér gekk illa í einu prófinu. Áhyggjur útaf þessu prófi hvíldu yfir manni um jólin og það var ekkert sérlega skemmtileg tilhugsun að þurfa kannski í fyrsta lagi að sækja um undanþágu til að gera meistaraverkefnið og í öðru lagi að fljúga til Þrándheims í ágúst til að taka þetta próf. Hvað þá með tilheyrandi framtíðarplönum um húsbyggingar. En svo á nýju ári komu góðu fréttirnar og þetta próf datt í hús, það hafa greinilega fleirum gengið illa eins og ég hafði reyndar heyrt.

Á reyndar eftir að fá einkunn úr verkefninu mínu (sem var eitt fag) en ég var búin að ná þessum 75% sem duga til námslána. Þannig að í fyrsta skipti á ævinni fékk ég námslán sem verður svo notað til að borga af öðru láni, lóðinni. Maður er núna kominn í skulda súpuna með öðrum landsmönnum. Þó svo að ég og Anna séum nú mjög stolt af því að hafa farið bæði í gegnum svona langt nám án lána.

Til að halda áfram í vitleysunni sit ég hérna yfir tölvunni og er alvarlega að velta því fyrir mér að eyða fyrstu krónum námslánsins í að kaupa mér fartölvu. Því að fartölvan sem ég er að vinna á er tölvan hennar Önnu sem hún keypti áður en hún byrjaði í hjúkrun og það var fyrir 5 og hálfu ári síðan (shit hvað tíminn flýgur hratt).
Ekki viss um að margir hefðu þolað eitt og hálf ár með 5 og hálfs árs tölvu. Enda er ég stundum við það að kasta tölvunni í vegginni þegar hún getur ekki verið með excel og pdf skjal ásamt kannski tónlist opið í einu. Fátt sem fer jafn mikið í taugarnar á mér og að þurfa að bíða í óratíma útaf tölvum og það vita þeir sem þekkja mig.

En er þetta ekki komið gott í bili.

Gleðilegt nýtt ár

Gleðilegt nýtt ár og takk fyrir það gamla.

Allir gestir farnir og tekur því hversdagsleikinn brátt við. Frábær jól og áramót að baki og alveg hreint út sagt frábært að vera með svona góða gesti í heimsókn yfir hátíðirnar.

Því má búast við að það lifni aðeins við hérna á blogginu og ætlaði ég nú alltaf að koma með fullt af listum um allt það besta á árinu. Plötur, lög og bíómyndir og aldrei að vita nema að maður komi með smá áramótapistil.

En það gerist nú ekki mikið núna og ætla ég því bara að segja þetta gott í bili. Kveðja frá Þrándheimi.

Skipti!

Jólin búin að vera mjög góð, skíði, sund og góður matur. Anna nýbúin að skrifa heila ritgerð um síðustu daga þannig að hér verður stiklað á stóru.

• 21: Jólagjafakaup og íbúðin þrifin hátt og lágt
• 22: Tengdó mætt á svæðið, farið í bæinn og skoðað sig um. Svo var auðvitað farið í HM og aðrar búðir.
• 23: Kvenfólkið ásamt Kára fóru í bæinn og við karlpeningurinn fórum á skíði upp í Vassfjellet. Frábært að komast á skíði.
• 24: Hamborgarhryggur í matinn og svo alveg fullt, fullt af pökkum. Kári var vakandi fram yfir miðnætti og alveg ótrúlega spenntur yfir öllum pökkunum.
• 25: Eftir smá afslöppun um morguninn var farið á skíði seinnipartinn. Kári og Rut (tengdó) voru á snjóþotu og aðrir á skíðum í brekkunni. Um kvöldið var svo borðað kalkún og slappað af.
• 26: Þessi dagur var notaður í sund í Pirbadet. Eins gott að nýta tímann vel því ekki er hann ódýr þar. Helsta sem maður verður að monta sig af eru að ég og Arnar stukkum niður af 10 m.
• Elgur með bernes var svo ekki slæmt til að klára "jólin".
• 27: Aftur á skíði.
• 28: Tengdó fara heim og svo koma mamma og pabbi núna í kvöld.

Nóg í bili en bendi fólki á barnaland, nóg af myndum og text um afdrif okkar seinustu daga.

Jólakveðja

Ég, Anna og Kári viljum óska öllum lesendum þessarar merku síðu gleðilegra jóla og farsældar á komandi ári.
Þeir sem ekki hafa fengið jólakort í pósti eða með tölvupósti geta látið sér þessa mynd duga, þetta er jólakortið í ár.

Undanfarnir dagar

Langt síðan að maður lét heyra frá sér síðast. Það er alltaf erfitt að byrja aftur þegar maður hefur ekki bloggað í langan tíma, maður fær einhverskonar valkvíða um hvað maður eigi nú að segja frá. En hérna er nú smá:

• Fór á mitt fyrsta norska djamm 11. des og var það bara helvíti gaman. Þetta var prófloka fagnaður hjá árganginum mínum í byggingunni, eða bygg og anlegg eins og það heitir, og var haldið í sal niður í bæ. Gekk vel að tala norskuna og gaman að hitta alla skólafélaga utan skólans.
• Var að gera verkefni eftir prófin sem ég skilaði 20. des. Fór ansi hægt af stað með að klára það, var með smá vanmat á hvað ég átti mikið eftir af því. Seinustu dagana fyrir skil var samt mjög mikið að gera. Ég var að vinna til kl. 4:30 nóttina fyrir skiladag og náði svo að skila 15:57 og var nú bara nokkuð sáttur með árangurinn.
• Eftir það var farið á fullt að klára jólainnkaup og svo var íbúðin þrifin hátt og lágt. Tengdó ásamt Arnari örverpi komu svo loksins aðfaranótt laugardags og voru þau sótt kl. 3 um nótt útá flugvöll, hressandi tími. En það var mikið búið að vara í gangi á Gardemoen sökum veðurs, mikil þoka varð til þess að ófært var í flugi í nokkurn tíma deginum áður og því mikið kaos í gangi. Þetta varð þess valdandi að töskurnar með öllum gjöfunum, fiskinum og auðvitað íslenska hamborgar hryggnum komu ekki til Þrándheims. Það var svo ekki fyrr en ég og Hörður (tengdó) keyrðum útá völl daginn eftir og þá voru töskurnar sem betur fer á sínum stað.
• Það er samt búið að vera ótrúlega gaman að vera loksins kominn í jólafrí og geta eytt tíma með fjölskyldunni, án samviskubits yfir lærdómi. Búið að fara í bæinn með allt liðið og bærinn skoðaður ásamt ferðum í HM og öðrum jólainnkaupum.
• Í dag fór svo kallpeningurinn á skíði og var það mjög svo skemmtilegt að komast loksins á skíði. Veit ekki hvað er langt síðan að maður fór á skíði fyrir jól en það tókst í ár.
  
• Jólin á morgun og læt þetta duga í bili.
  

Próflok með meiru

Kláraði prófin á föstudaginn. Gekk ágætlega í sjálfur sér og þá sérstaklega ef tekið er tillit til þess hversu stuttan tíma maður hafði fyrir öll þessi próf. Ekki nóg með að þau hafi lent öll frekar snemma í próftöflu heldur hrúguðust þá einnig á nokkra daga, mjög svo hressandi. Get sagt að það hafi gengið vel með efnið frá því í ár en ekki vel í því sem maður tók upp frá því í fyrra. En svona er þetta þegar eitthvað er skilið eftir.

Þannig var það nefnilega að þegar skólinn byrjaði þá var ekki vitað hvort að eitthvað af þessum prófum yrði munnleg. Það var því verið að hringla með þetta allt saman langt fram eftir önninni og á endanum voru þessar dagsetningar settar niður. Það var samt verið að hringla með eitt prófið fram yfir miðjan nóvember sem er ekki gott. En nóg um það.

Próflokum var fagnað með að fara á smá bæjarflakk og svo bauð Anna okkur Kára út að borða á Ekon veitingarstaðinn í Tyholt turninum. Matur fínn og skemmtilegt að komast aðeins út úr húsi og gera eitthvað öðruvísi.

Það var svo einhverntímann um nóttina að ég vaknaði og var alveg að drepast í maganum. Gat ekki sofnað aftur sökum verkja og fannst því ákjósanlegt að leyfa Önnu að sofa út þegar vekjaraklukka heimilisins var komin á kreik, þar sem ég var nú löngu vaknaður. Ég entist í um tvo tíma og þá var það aftur rúmmið framan af degi og sófinn eftir það. Borðaði tvö kíví og svo eitt jógúrt fyrir háttinn þegar maginn var farinn að skána. Já svona var próflokum fagnað hjá mér, og til að forðast allan misskilning um þynnku eða álíka þá var drukkinn einn bjór kvöldið áður og það með kvöldmatnum.

En nú er maður bara mættur ferskur niður í skóla til að klára eitt stykki verkefni. Er að möndla saman árslista og er því góð tónlist sem ómar í eyrunum þessa stundina. Þannig að góðar stundir...

Þrif

Ég hlakka til þegar ég er búinn í prófum og þurfa ekki að fara heim að þrífa. Þannig er það nefnilega að í seinustu tvö skipti sem ég hef verið í prófum þá hef ég alltaf fagnað þeim merka áfanga með að vera á fullu að bæði þrífa og pakka áður en flogið er til Ísland.
En nú þarf þess ekki og helgin verður notuð í algjöra afslöppun. Anna er að vinna um helgina þannig að ég og Kári finnum okkur eitthvað skemmtilegt að gera í hálkunni!

Smákökur

Ég dreg allar fyrri yfirlýsingar mínar um að ég sé ekki smáköku kall til baka.

"Ég er í sjálfu sér ekki mikill smáköku kall"

Tók nokkrar smákökur með mér í skólann og jesús hvað þær eru góðar, ef ég væri með boxið með mér þá væru þær búnar. Eins gott að maður sé ekki að læra heim.

KÖ

Ekkert nýtt að segja nema að það eru fullt af myndum af grallaraspóanum honum Kára inná barnalandi:
http://www.kariorvarsson.barnaland.is/

My name is Örvar and I´m addicted

Úff hvað það er gott að geta sest niður fyrir framan sjónvarpið og horft á eitt stykki Dexter.
Sjónvarpið hefur átt mjög svo lítinn hluta af lífi mínu undanfarnar þrjár vikur. Held að það séu innan við tveggja klukkustunda áhorf á undanförnum vikum, þetta hlýtur að vera met.

Yfirleitt þegar ég hef verið í prófum hef ég verið duglegur að verðlauna mér með að eiga góða stund fyrir framan sjónvarpið og horfa allavega á einn þátt, en nú var einfaldlega ekki tími. Held ég hafi sjaldan lært eins mikið og þennan nóvember mánuð, reyndar ekki teiknað eins mikið heldur en það er önnur ella.

Jæja snemma í háttinn í dag, held að líkanum veiti ekki af því enda hafa undanfarnir sólarhringar verið ansi langir.

Smá við bót:
Bloggaði þetta fyrir ári síðan, tilviljun?

Góða nótt

Andfótboltaliðið Liverpool

Varúð fótbolta póstur, ef þú hefur ekki áhuga á ensk knattspyrnunni þá geturðu hætt hér.

Liverpool var mikið gagnrýnt í október fyrir mörg jafntefli og almennt lélegan fótbolta, liðið var kallað andfótbotla lið sem var algjörlega vonlaust. Arsenal og Manutd voru best í heimi og mörkin flæddu inn hjá þeim.

Nú er kominn desember og þessi árlega haustlægð hjá Liveprool er lokið. Nú er það þannig að Liverpool hefur skorað 26 mörk í deildinni (næst mest í deildinni) og fengið á sig 6 mörk (lægst í deildinni). Það eru mjög fáir að hrósa Liverpool þessa dagana, þrátt fyrir frábæra knattspyrnu. Held að þeir hafi skorað 21 mark á móti 1 í seinustu 5 leikjum en samt er Liverpool ekki að spila vel, hin liðin yfirleitt bara léleg. Er svona gaman að gagnrýna Liverpool í fjölmiðlum en aftur á móti ekki hægt að hrósa þeim?

Ívar var að gagnrýna Liverpool og sagði að Rafa væri vita vonlaus þjálfari sem kynni ekki að vinna ensku úrvalsdeildina. Hvað skildi Ívar segja núna þegar Liverpool er komið fyrir ofan Man utd þegar þau hafa spilað jafn marga leiki. Ekki nóg með það heldur andfótboltaliðið skorað 3 mörkum meira en júnæted!


Hins vegar eru Arsenal að spila mjög vel og því er ekki að neita, sem og manutd.

Ein pæling í viðbót. Afhverju voru ekki allir að tala um Ferguson og hans "róteringar" þegar hann hvíldi Ronaldo og þeir töpuðu fyrir Bolton, sem bæþevei Liverpool pakkaði saman í dag.

Vildi bara fá að koma þessu að.

Bið að heilsa í bili, áfram Liverpool

Mannréttindabrot

Ég skil ekki afhverju það er ekki búið að banna próflærdóm. Þetta er ekkert annað en brot á mannréttinum að láta mann kveljast svona.

Jæja ætla að halda áfram að lesa um trykkfeltsteori for skiver, svo fer maður alveg að fara skoða trykkfeltsteori for plater/skall.

Liverpool er allavega að vinna Boltan, það er gott.

Torrent

Gott grín í allri torrent umræðunni.

Annars er hér góð umfjöllun um eina auglýsingu sem ég og Árni hlógum okkur máttlausa yfir í sumar. Er þeim alvara með þessu?
Ætlaði alltaf að fjalla um þessa auglýsingu en fann hana ekki á netinu fyrr en nýverið, svo er bara búið að skrifa svo fína grein um hana að ég læt mér duga að benda á hana.