Nýjustu tölur

Kári varð 9 mánaða í gær og í dag fór hann í skoðun. Nýjustu tölur eru:
Þyngd: 9800 gr.
Hæð: 73,5 cm.

Henn fer alveg að ná Jóni Hauki :)

På DVD #II

Kurt Wallander: Brannvegg (2006)
Búinn að lesa nokkrar bækur með Kurt og yfirleitt fundist þær góðar. Þetta er framhaldsmynd í tveimur hlutum sem er bara nokkuð góð. Er hægt að segja að "Kurt klikkar ekki"?
Einkunn: Brandvägg fær 6

The Devil Wears Prada (2006)
Það þekkja allir þessa formúlu, ljóta stelpan verður sæt og gleymir hver hún er í raunveruleikanum. Skil ekki afhverju Meryl Streep var tilnefnd til Óskarsverðlauna fyrir leik sinn í þessari mynd, geta ekki allir leikið "tæfu"?
Einkunn: The Devil Wears Prada fær 5

The Holiday (2006)
Fínn hlutinn með Jack Black og Kate Winslet en Cameron Diaz fer eitthvað í mig eftir að hún lék í The Sweetest Thing. Annars alveg ágætis rómantísk gamanmynd ef menn eru fyrir þannig tebolla.
Einkunn: The Holiday fær 6

Casino Royale (2006)
Besta James Bond myndin í langan tíma. Hefði samt verið fróðlegt ef Quentin Tarantino hefði fengið að leikstýra henni. Mjög ánægður með Daniel Craig sem Bond.
Einkunn: Casino Royale fær 8

Blood Diamond (2006)
Góður leikur og góð mynd, lítið um hana að segja.
Einkunn: Blood Diamond fær 8

Hollywoodland (2006)
Ekki vissi ég mikið um fyrsta Superman-inn en þetta er svona lala mynd. Ekki svo góð en ekki heldur slæm.
Einkunn: Hollywoodland fær 5

Little Miss Sunshine ( 2006)
Átti einhvern vegin ekki von á miklu og kom því þessi mynd mér nokkuð á óvart. Flottir leikarar og góður söguþráður.
Einkunn: Little Miss Sunshine fær 9

Children of Men (2006)
Nokkuð furðuleg mynd, áhugaverð pæling en náði mér ekki alveg, bjóst við meiru.
Einkunn: Children of Men fær 6

Music and Lyrics (2007)
Hugh Grant hefur verið að koma sterkur inn, Anna er alltaf fljót að biðja mig um að ná í rómantískar gamanmyndir og er þetta alveg fín þannig mynd.
Einkunn: Music and Lyrics fær 7

The Pursuit of Happyness (2006)
Mjög góð mynd, átti von á einhverju þunglindi yfir þessari mynd en Will Smith er mjög góður og bara heilt yfir mjög góð mynd, kom mér á óvart.
Einkunn: The Pursuit of Happyness fær 8

Night at the Museum (2006)
Átti heldur ekki von á miklu. Hélt að þetta væri svona mynd sem ekkert myndi gana upp og færi því í taugarnar á mér. En alveg fín grín mynd en ekkert meira en það. Held það sé samt kominn tími á að Ben Stiller fari að finna sér eitthver önnur hlutverk, þó svo að hann og Owen Wilson séu alltaf góðir saman.
Einkunn: Night at the Museum fær 7

Babel (2006)
Úff, leiðindi. Hélt ég væri að fara horfa á "Drama/Thriller" en jesús hvað þetta var ekki þannig mynd. Nokkrar sögur fléttar saman svipað og í Crash nema hvað að þetta var bara of artí fyrir mig.
Einkunn: Babel fær 3

Er þetta ekki komið ágætt í bili!

Busy week!

Búið að vera nóg að gera í vikunni.

Fyrsta verkefnið var að "klára" að skrifa ritgerð í Bestandighet, vedlikehold og reparasjon av betongkonstruksjoner. Var að skrifa um rannsóknir á alkalivirkni í steypu, veit æði, ég skal senda ykkur þessa ritgerð ef þið viljið :). Var alla helgina + mánudag að því og ekki get ég sagt að mér hafa fundist það gaman. Á samt eftir að laga hana aðeins áður en ég skila henni inn.

Hópurinn að taka sporvagn heim frá Eivind (02.05.2007)

Næst var það kynning á verkefninu okkar í Experts in Team. Þetta er próflaus áfangi þar sem maður þarf að skila bæði verkefni og svo einskonar vinnumöppu. Gengur aðalega útá að kenna fólki að vinna í hópum. Fínt að læra það en verkefnið sem við fengum var mökk leiðinlegt. Þannig að það er ágætt að við séum að klára þetta.
Um kvöldið bauð prófessorinn öllum heim og var grillað og spjallað. Þó svo að áfanginn er búinn að vera leiðinlegur þá er ég búinn að kynnast fullt af fólki allsstaðar að úr heiminum, sem er mjög skemmtilegt.
Myndir frá EiT eru hér.

Ég og Anna úti að borða á Jonathan (03.05.2007)

Í gær var það svo hittingur hjá Íslendingafélaginu Kjartani hérna í Þrándheimi. Félagið bauð í mat á Jonathan veitingastaðnum og boðið uppá þriggja rétta máltið. Held þetta sé það flottast sem ég og Anna höfum fengið okkur hérna í Þrándheimi. Einhverskonar lax í forrétt, steinasteik í aðalrétt og ostakaka í eftirrétt. Mjög gaman að hitta alla, svona áður en allir fara að loka sig inni fyrir próflærdóminn.

Úff *Uppfært*

Maður skilur stundum ekki afhverju manni finnst gaman að horfa á fótbolta. Þegar liðið manns gengur vel og mikið er undir í leikjum er maður of stressaður til að geta notið þess að horfa á sjálfan leikinn.

En það er þess virði ef gengur vel en djöfulsins kvöl getur þetta verið ef það gengur illa. Ég hef nefnilega ekki góða tilfinningu fyrir leiknum sem er að fara byrja eftir 4 mínútur...en áfram Liverpool!

----------------uppfært-----------------------------
Já þetta var vel þess virði og það er eitthvað svo gaman að sjá Mourinho tapa eftir allt sem hann hefur verið að segja.

Skriðdrekinn

Eins og ég sagði frá í seinustu færslu þá er Kári farinn að skríða. Nú er hann alveg óstöðvandi og flakkar enda á milli í íbúðinni.

Hérna er skriðdrekinn á flakki í gær.

Fréttir frá Norge...

Held það sé alveg tímabært að fara láta heyra í sér, þó svo að Snopp sómi sér vel á forsíðunni.

Nú erum við búinn að "planleggja" sumarið. A&K koma "heim" 20. maí og svo kem ég sjálfur í eigin persónu 31. maí, á þeim merkisdagi! Sumarið verður ekki langt í ár því við förum aftur "heim" til Noregs 3. ágúst.

Við verðum bæði að vinna í sumar þannig að ef einhver bíður uppá pössun í einn dag má sá hin sami hafa samband. Fólk verður nú að fá að upplifa að vera með skriðdrekann í einn dag! Talandi um Kára þá gerðist það í beinni útsendingu til H23 í dag að Kári byrjaði að skríða. Þetta er reyndar ekki 100% löglegt skrið, hann er eiginlega á einni löpp og einu hné og fer þannig áfram. Þannig nú verður allt gert fokhelt upp í ca. 1 m.

Af skólnum er það að frétta að það er allt að klárast um þessar mundir. Mikið um verkefna skil á þessum árstíma þannig að það er alveg nóg að gera. Svo er um vika í upplestrar frí og svo byrjar alvaran 21. maí.

Er þetta ekki nóg í bili?

14 ár...

Á maður að trúa því að það séu 14 ár síðan þessi snilld kom út?

Sumar / Snjór

Já þá er sumarið svo sannarlega komið hérna í Þrándheimi, vaknaði við þetta í gær. Veðrinu til varnar, þá er nú komin sól núna en það er samt snjór 21. apríl!!!
Ég sem hélt að vorið væri komið á þessum tíma, silly me.
Annars er bara mikið að gera um þessra mundir í skólanum...

Myndir segja meira en mörg orð

Helgin var mjög góð!

Örvar og Kári úti að leika sér í 15°C og sól (15. apríl 2007)

Svo kemur ein mynd af okkur feðgunum sem ég varð bara að setja inn. Anna keypti þennan bol á Kára fyrir stuttu með það í huga að ég ætti alveg eins bol. Tvíburar?

Feðgar í alveg eins bol (15.04.2007)

Fullt af nýjum myndum inná barnalandi. Anna mun duglegri en ég að setja myndir inn.

Fótbolti

Ég sé fyrir mér úrslitaleikinn...Liverpool - Man utd og auðvitað vinnur Liverpool.

Annars finnst mér alveg djöfullegt að vera mæta Chelsea í enn eitt skiptið, hefði verið gaman að sjá Liverpool mæta Valencia, en svona er boltinn eins og þeir segja.

Martröðin er svo að sjá Chelsea og Man utd í úrslitaleiknum, með hverjum ætti maður að halda með í því einvígi?

Picasa web album

Mamma og pabbi í heimsókn

Var að setja inn myndir frá heimsókn mömmu og pabba. Er að prófa nýja heimasíðu til að geyma myndirnar mínar, klikkið á myndina hérna fyrir ofan til að komast inn.

Þessa myndir eru á Picasa sem er ókeypis forrit frá Google. Maður er með eitthvað í kringum 1 GB svo það ætti að duga mér í nokkuð góðan tíma. Hérna er linkur á síðuna:
http://picasaweb.google.com/orvars

Ég er að spá í að nota þessa síðu undir myndirnar frá heimsóknum og daglegu lífi en flickr verður meira svona ljósmyndatengt...eitthvað þannig, er samt ennþá að skoða þetta allt saman.

Páskafríið var mjög gott og hvíldin var vel þegin. Fórum í matarboð um helgina til Jóa og Kittýar þar sem boðið var upp ljúffenga steinasteik, mjög gott. Svo á páskadag fengum við okkur hreindýr sem var alveg frábært.

En nú tekur hversdagsleikinn aftur við, farinn að læra á fullu enda nálgast skiladagur á nokkrum verkefnum.

Gleðilega Páska

Í dag er Páskadagur og ég fór í Kaþólska messu og svo í skírn frá Rúanda, nei það er ekki fyrsti apríl...

Gleðilega Páska

Photoshop

Myndirnar hérna fyrir ofan eru af föður mínum honum Steingrími þegar hann var ungur. Þessi mynd hangir á ísskápnum í H23 og er ég búinn að laga hana aðeins í Photoshop, vonandi er þetta ásættanlegt.

Svei mér þá að maður sjái nú ekki bara smá af Kára í pabba!

Páskar í Þrándheimi

Nú er Páskafríið formlega byrjað hérna í Þrándheimi. Bærinn er frekar daufur um að litast enda virðist megin þorri íbúa Þrándheims hafa farið eitthvað burt um Páskana. Hvort sem maður er að labba hérna í Moholti eða niður í bæ, það virðist enginn vera á ferð. Flest allar búðir eru lokaðar yfir Páskana. Þetta er annað en heima, mætti samt vera smá millivegur frá því hvernig þetta er hér og heima.

Það var mjög gaman að hafa m&p í heimsókn en þau flugu heim í dag eftir að hafa verið hér í ca. 6 daga. Ég var búinn að lofa þeim að vorið væri komið í Þrándheimi en gat ekki alveg staðið við það. Þó svo að veðrið hafi nú alveg sloppið þá var það nú ekkert til að hrópa húrra fyrir, kalt og oft rok og rigning. Dagurinn í dag toppaði svo allt því þegar við vöknuðum í morgun var allt hvítt úti, það er svo búið að snjóa í allan dag og einnig nokkuð rok. Var í fréttunum að þetta sé versta Páska veðrið hérna í Norge í mörg ár.

Laugardagurinn góði...

Laugardagurinn síðastliðinn var mjög góður. Anna og Kári komu heim, Mamma og pabbi komu í heimsókn og Liverpool vann Arsenal 4-1. Hvað getur maður beðið um meir?

Það er annars búið að vera mjög gaman hjá okkur í Páskafríinu en ég byrjaði sem sagt í Páskafríinu á föstudaginn. Búið að gera margt: fara í bæinn, nokkra gönguferðir, skoðað útsýnið yfir Þrándheim, næsa nágrenni Þrándheims skoðað og svo í gær var farið til Røros sem er námubær sem er á heimsminjaskrá. Allt þetta var nú mjög gaman en dagurinn í dag fer ekki á topp 10 daga hér í Þrándheimi, 6 tíma búðarráp er ekki minn tebolli.

Liverpool í meistaradeildinni í kvöld en spurning hvor ég þurfi að leyfa liðinu að horfa á Kurt Wallender framhaldsmyndina... maður fær víst ekki að ráða öllu þó svo ég hafi nú náð að láta Jón Hauk og Margréti horfa á meistaradeildina þegar þau voru í heimsókn.