Slæmur foreldri...

Já maður hefur ekki verið beint góður faðir þessa vikuna. Ég er búinn að eyða flestum stundum sólarhringsins hérna niður í skóla til að reyna að undurbúa mig fyrir þessa martraðar helgi sem er jú komin af stað núna.

Á fimmtudaginn fékk Kári að fara heim með Kittý, Freyju og Ásdísi og var þar þangað til að Anna sótti hann á milli 5-6. Svo í gær var þetta frekar svakalegt fyrir litla orkuboltann okkar. Kári fór á leikskólann um 9:30 og kom ekki heim fyrr en ég sótti hann um 7 leitið. Svona er þetta að búa í útlöndum og engar ömmur eða afar til að passa. Anna var að fara á kvöldvakt og ég í próf í dag. Því var brugðið á það ráð að hafa Kára lengur á leikskólanum í þetta eina skipti (fór reyndar á annan leikskóla á milli 4:30-7). Það var ekki að sjá á barninu kl.19 í gær að hann var búinn að vera góðan vinnudag og næstum tvo yfirvinnutíma frá foreldrum sínum. Var í fullu fjöri með leikskólakennurunum að taka til þegar ég mætti á svæðið og var nú ekkert að hlaupa til mín. Aftur á móti var hann orðinn nokkuð þreyttur þegar við komum heim og sofnaði nokkuð auðveldlega.
Það var svo í morgun að hann var eitthvað stúrinn og greinilegt að hann var ekki par sáttur með þess "illu" meðferð í vikunni.
En er það versta yfirstaðið varðandi vaktaskiptan hjá foreldrunum þannig að drengurinn mun ekki fá svona illa meðferð í bráð.

Set svo eina mynd af dregnum sem í sjálfu sér tengist þessari færslu ekki neitt. En djöfulli er sófinn okkar flokkur, vill einhver kaupa?

Markaðsfræði

Er að hlusta af nokkuð mikið af tónlist þessa dagana. Er með á "shuffle" og því koma hin ýmsu lög upp sem maður hefur ekki hlustað á lengi. Datt inná lag með Ajax sem er á hinum frábæra diski Icerave frá 1992. Tékkaði á tónlist.is til gamans til að fá umslagið á plötunni.

Fyrst vill ég hrósa Tónlist.is fyrir að hafa þessa snilldar plötu þarna. Þarna eru nokkrar af perlum íslenskar "rave" menningu.

En ekki skil ég alveg markaðsfræðina í að selja þessa plötu á 1299 kr. Hvaða heilvita maður kaupir 15 ára gamla rave plötu á 1299 kr? Bara að velta því fyrir mér.

Markmið keppenda að eignast vini...

Þetta er fyndið:
Ungfrú Ísland í flokki karla

Heimsóknir

Jólin verða ansi góð í ár. Eins og ég sagði frá fyrir ekki svo löngu síðan þá verðum við fjölskyldan saman hérna í Þrándheimi um jólin, semsagt engin heimför til Íslands.

Ég á að skila verkefninu mínu 20. desember og svo strax 21. desember koma tengdó og örverpið þeirra í heimsókn og gista í viku yfir jólin. Það verður örugglega mjög gaman að fá þau hérna út og upplifa jólastemmninguna í öðru landi og vonandi komast eitthvað í skíði einnig.

Tengdó fara heim 28. des og þá strax sama dag koma mamma og pabbi í heimsókn og ætla einnig að gista í viku og vera hér yfir áramótin. Auðvitað alveg frábært að fá þau í heimsókn og kominn tími á að leyfa þeim að sjá Kára sem hefur nú breyst nokkuð mikið síðan þau sáu hann síðast.

Þannig að það verður nóg að gera hjá okkur að sinna gestum í jólafríinu. Spurning hvort við værum svona vinsæl ef við ættum ekki eitt stykki Kára?

I don't like mondays

Þó svo að það skiptir litlu máli fyrir mig hvort að dagurinn heitir mánudagur eða föstudagur þá er alltaf eitthvað við mánudaga.
Hérna er myndband í tilefni dagsins (fann þetta á snilldar tónlistar blogginu Topp 5 á föstudegi). Ekki nóg með að lagið er gott þá er myndbandið algjör snilld. Eigum við að ræða eitthvað hárgreiðsluna á söngvaranum.

Afmælisbarn dagsins

Anna er 25 ára í dag og vildi ég nota tækifærið og auglýsa það hér, þarf nú ekki að óska henni til hamingju þar sem ég og Kári sungum afmælissönginn í morgun. En hvað með það, til hamingju með afmælið ástin mín.

Kökuboð verður haldið í Moholti í tilefni dagsins og eru allir söm tök hafa á velkomnir.

Hún tekur við hamingju óskum í gegnum gsm í síma +47 95011854 og einnig í gegnum tölvupóst annahardar(hjá)gmail.com.

Norsk tónlist

Svei mér þá mér tókst loksins að finna skemmtilega norska tónlist. Var alveg ákveðinn í því þegar maður kom hérna út að finna eitthvað norskt gull. Reyndar allt Hipp-Hopp/Rap lög en ekkert verri fyrir það. Persónulega finnst mér þetta allt vera helvíti góð lög.

Það heitasta í dag hérna í Norge eru félagarnir í MadCon. Þeir eru að gera allt vitlaust með lagið Beggin. Var að skutla Önnu í jólahlaðborð í gær þegar þetta lag var í útvarpinu, Anna hækkaði í botn og fór að dilla sér með. Í eitt að fáum skiptum sem ég hef ekki heyrt lag sem Anna hefur heyrt en til að koma mér til varnar þá hlusta ég ca. ekki neitt á útvarp á meðan Anna brunar um bæinn hlustandi á útvarp á milli staða.



Næst eru það Erik og Kriss og er þetta einnig nokkuð nýtt lag (að ég held).



Svo í lokin er eitt lag frá 2002 þar sem fyrr nefnd hljómsveit MadCon kemur fyrir en tónlistarmaðurinn í þetta skiptið er Paperboys.



Ekkert mp3 í þetta skiptið enda öllum nokk sama held ég. Ef fólk vill fá þessi lög "lánuð" til frekari hlustunar er þeim bent á að senda mér tölvupóst á orvars (hjá) gmail.com eða bara láta vita í commentkerfinu.

Dagurinn í dag í myndum

Eins og ég sagði frá fyrr í dag var dagurinn í dag alveg ótrúlega fallegur. Ég tók litlu myndavélina með mér í skólann og smellti nokkrum myndum á för minni í og úr skólanum. Engin meistaraverk enda ekki góð birtu skilyðri en þetta kemst vonandi til skila.

Í Moholti

Svali gaurinn á hjólinu...

Á leiðinni heim í einni hliðargöt, þetta er tunglið þarna efst

Að hjóla upp Jonsvannsvegen

Jólin?

Í dag er 23. nóv og því má alveg bráðlega fara hugsa um jólin, er það ekki?
Nú er allt á kafi í snjó hérna í Þrándheimi og ekkert smá fallegt um að litast. Fátt er fallegra en þegar snjórinn situr fastur á trjánum, ekki alltaf fokinn af á núlleinni eins og gerist svo oft heima. Vildi bara vera úti að taka myndir dag, eitthvað sem maður hefur ekki gert mikið af þessa önnina sökum anna.
Eitt það besta við jólin eru mandarínur og piparkökur. Ég er í sjálfu sér ekki mikill smáköku kall en piparkökurnar eru góðar (kannski flokkast þær ekki undir piparkökur?). Er þessa stundina með piparkökur og mandarínur með mér hérna niðri í skóla og það er fátt betra en að snæða sér á þeim í internet pásum.

Jæja aftur til starfa...nóg að gera.

Stressið stigmagnast...

Eitt sem ég fattaði í dag, þegar ég var í fyrri fyrirlestri dagsins, var það að þetta voru seinustu fyrirlestrar sem ég á eftir að sitja í þessu námi! Auðvitað verður kannski eitthvað af almennum fyrirlestrum eða fundum á næsta ári en þetta voru seinustu fyrirlestrarnir. Frekar skrýtin tilhugsun en maður hefur eiginlega ekki tíma til að njóta hennar því það er svo helvíti stutt í próf.

Próftaflan þetta árið er án efa versta próftafla sem ég hef fengið. Á fyrstu fimm dögum próftöflu fer ég í 3 próf og það á 4 dögum. Þá eru ca. 17 dagar eftir til að taka próf á!!! Ekki alveg eðlilegt að troða þessu svona framarlega þannig að maður hefur sama sem engann tíma til að undirbúa sig.
Þetta gefur mér reyndar góðan tíma til að gera verkefnið mitt (eitt fag) sem ég á að skila 20. des en ég þarf nú ekki alveg svona marga daga til að klára það. Nokkrir dagar hefðu verið nóg. Þannig að ég fagna ekki að prófin eru búin snemma í ár.


Í gær var ég svo að reyna að klóra mig í gegnum eitt það leiðinlegasta sem ég hef lesið í langan tíma. Efnasemsetning sements og hvernig efnasamböndin verða til þegar þau blandast við vatna. Úff, mér finnst alveg nóg að vita um efnafræði steypu og er alveg nokkuð sama um hvernig þessu blessuðu efnasambönd koma saman. Ég skal skoða það ef ég fer út í sementsframleiðslu en ekki í þessu.

Þannig að þessa daga er mjög mikið að gera en Anna er nú svo góð að hún er dugleg að hjálpa til með að létta á vinnuálaginu heimafyrir :)

Jæja ætla að halda áfram að læra.

Húsnæðisverð

Þetta er alveg gríðarlega hressandi. Skildi byggingar kostnaður hafa hækkað svona mikið? Lóðargjöldin hafa kannski hækkað fimmfalt en það er nú varla skýringin.

Gaman að vera námsmaður sem á ekki bót fyrir borunni á sér að þurfa að fara út í þessa vitleysu.

Góðan dag...

Góðan dag
Það er mjög fallegur dagur hérna í Þrándheimi í dag. Fór með Kára á leikskólann og svo var hjólað í skólann í -4°C frosti og með bleikan himinn yfir bænum. Bærinn alltaf mjög fallegur í svona stillu þegar sólin er að koma upp.

Fyrir þá sem ekki vita er snjórinn löngu farinn aftur. Það var nú bara ágætt því það var orðið mjög hættulegt að ferðast um bæinn sökum klaka brynju og almennar hálku. Ég tók góða "head dive" á leiðinni í skólann í seinustu viku og endaði rennandi blautur á hliðinni, ekkert sérlega þægilegt. Ég var farinn að halda að ég gæti bara ekki dottið á fáknum góða. Kannski var maður orðin of góður með sig og því farinn að fara ansi hratt niður bröttu brekkurnar á leiðinni í skólann í vafa sömum aðstæðum. En maður lærir af reynslunni.

Þá vildi ég óska Jón Hauki, Margréti og Guðrúnu til hamingju með nýja húsið sitt við Fróðaþing 24. Loksins í gær komu nýjar myndir af húsinu og varð maður alveg veikur á að skoða þær. Það er grunnt á byggingarbakteríunni í manni. En alveg stórglæsilegt hús og manni hlakkar til að koma í heimsókn.

Á dagskrá...

Ekki búinn að horfa á mikið af tilvonandi óskarsverðlauna myndum undanfarið, en svona er þetta stundum.

Pirates of the Caribbean: At World's End (2007)
Seinasti myndinni (að ég held) í þessum þríleik. Þessi mynd er svona svipuð og mynd númer 2 (Pirates of the Caribbean: Dead Man's Chest). Býður ekki uppá neitt nýtt og er bara verið að teygja lopann ennþá lengra. Þetta er samt góður lopi og alveg hægt að hafa gaman af þessari mynd. En í sjálfu sér er fyrsta myndin lang best.
Það gekk eitthvað erfiðlega að muna eftir hvernig mynd númer tvö endaði og því var hún nokkuð ruglingslega í byrjun. Það segir kannski allt sem segja þarf um mynd númer tvö.
Johnny Depp er alltaf góður og það sama má segja um Geoffrey Rush og svo er Keira Knightley er alltaf sæt.
Einkunn: Pirates of the Caribbean: At World's End fær 7

The Good Shepherd (2006)
Mynd sem Robert De Niro leikstýrir og fjallar um njósnir í stríðinu og hvernig CIA verður til. Þunglyndisleg, hæg og lítið spennandi mynd með Matt Damon í aðalhlutverki.
Einkunn: The Good Shepherd fær 5

Surf's Up (2007)
Ég og Kári horfðum á þessa mynd í nokkrum hlutum eftir að hann kom heim af leikskólanum. Alveg fínasta mynd um brimbretta mörgæsina Cody Maverick. Jeff Bridges leikur Big Z sem er svona svipuð týpa og The Dude (þú átt bara að vita hver það er) og er skemmtilegur í því hlutverki.
Annars man ég eftir því þegar ég var í straumfræði, back in the days, þá var kennarinn að tala um hversu erfitt væri að gera vatn (straum) eðlilegan í þessum teiknimyndum. Það hefði tekist fyrst í Shrek að mig minnir (man ekki alveg hvaða mynd það var). En allavega er vatnið og sjórinn í þessari mynd mjög vel gerður, bara fyrir þá sá eru mikið að spá í straumfræði.
Hérna er svo feminista dómur um þessa mynd sem nokkuð vit er í.
Einkunn: Surf's Up fær 6

Cars (2006)
Ég og Kári horfðum einnig á þessa mynd saman í einhverri leti. Alveg ágæt mynd þar sem Owen Wilson er mjög góður sem hin hrokafulli Lightning McQueen. Var reyndar búinn að lesa bókin fyrir Kára nokkuð oft og þekkti því söguþráðinn nokkuð en það skemmdi í sjálfu sér ekki mikið enda ekki mjög djúp mynd. Fín mynd fyrir börnin en er samt ekki eins góðar fullorðins myndir eins og The Incredibles og Shrek.
Einkunn: Cars fær 6

Sunshine (2007)
Vísindaskáldsögu bull. Þessi mynd fær 7,3 á imdb sem ég bara skil ekki, einhverjir Star Trek nörrar sem finnst þetta skemmtilegt. Ég er ekki þar á meðal.
Einkunn: Sunshine fær 4

Wild Hogs (2007)
Maður hefur nú stundum gaman að horfa á heimskulegar gamanmyndir og þessi fer undir þann flokk. Skil nú ekki alveg hvernig er hægt að fá svona fína (og ekki fína en fræga) leikara til að leika í svona mynd. En allt er hægt ef peningar eru fyrir hendi. Fólk veit hvað það er að fara út í þegar það horfir á þessa mynd og fær í sjálfu sér það.
Einkunn: Wild Hogs fær 5

Lóðakaup

(Hægt að smella á mynd til að sjá stærri útgáfu)

Í gær var mjög stór dagur í lífi okkar Önnu (og Kára þó svo hann hafi nú ekki fattað mikið), því við fengum þá úthlutað lóð við Lundaþing 9-11 í Vatnsendahlíð. Sóttum um parhúsalóð með Styrmi bróðir (eða fyrirtækinu hans 2 Naglar) og vorum ein með þessa lóð og fengum hana því átakalaust.

Mjög mikil stress búið að vera á heimilinu sökum þessa. Fyrst átti úthlutunin að vera fimmtudaginn, svo var því frestað fram á föstudag, svo fram á mánudag og svo loksins í gær frétti maður að við fengum þessa fögru fögru lóð.

Þessar lóðir eiga að vera tilbúnar í lok árs 2008 og líklegt þykir að sú dagsetning muni eitthvað færast aftur og giskar maður helst á að þetta verði tilbúið svona um vorið 2009. Við stefnum samt ekki á að byrja fyrr en vorið 2010. Þannig að framundan er að klára þetta námsvesen og svo bara spara spara og spara fyrir einu stykki húsi.

Ég hlakka alveg ótrúlega mikið til að fara byrja á öllu veseninu sem þessu fylgir. Teikna, hanna, reikna og ákveða allt frá því hvernig húsið lítur út niður í hvernig hurðahúna maður kaupir.

Mikil hamingja ríkir á heimilinu þessa dagana og maður iðar í skinninu á að geta byrjað :)

Þá fengu Stebbi og Silla einnig úthlutað lóð þannig að gaman verður að vera með einhvern svona nokkurvegin samferða í þessu öllu.

Hérna er hægt að finna allar upplýsingar um skipulagið á þessu svæði:
Kópavogurlóðir.is

Lundaþing 9-11 er undir svæði E2. Hérna er skýringarmynd og hérna er deiliskipulag. Bara að hægri smella á linkana.

Ég bjó svo til punkt í Goggle Map sem ætti að sýna hvar þetta liggur, svona ca. Það ber þó að geta að loftmyndin er ekkert sérlega ný og er því byggðin komin mun nærri en á þessari mynd.
Lundaþing 9 á Google Map

Þetta verður örugglega mjög skemmtilegt hverfi. Mjög stutt í grunnskóla, Guðmundarlundur (falin perla höfuðborgarinnar) er þarna við hliðin á og svo eru einfaldlega allir að flytja þarna uppeftir.

Jæja á maður að reyna að læra!

Tony og typpalingarnir

Maður var nú mikill Guns N' Roses maður í gamla daga og því var Bob Dylan slagarinn Knocking on Heavens Door alltaf í miklu uppáhaldi hjá mér. Alltaf fundist sú útgáfa mjög góð ábreiða af laginu.
En núna er verið að gera mynd um ævi Bob Dylan sem mun heita I'm not there og á soundtrackinu taka nokkrir frægir listamenn góða Bob Dylan slagara. Tony ogtyppalingarnir eru þarna á meðal og taka umrætt lag. Langt síðan maður heyrði eitthvað nýtt frá Tony og typpunum og því afar hressandi (þversögn) að heyra þessa útgáfu af þessu flotta lagi.
Antony & The Johnsons - Knocking on heavens door [mp3]

Til að hafa þetta alvöru lét ég líka fylgja Guns N' Roses og Bob Dylan útgáfurnar.
Guns N Roses - Knocking On Heavens Door [mp3]
Bob Dylan - Knocking on heavens door [mp3]

Verði ykkur af góðu.